ជាក់ស្តែង នៅចន្លោះពីកុងត្រូលមាត់ច្រកនៃភាគី កម្ពុជា-ថៃ ឃើញមានរថយន្តធុនមួយបាំងរបស់ឈ្មួញថៃ បានប្រមូលទិញស្លឹកព្រិចពីខាងឈ្មួញខ្មែរ យ៉ាងគគ្រឹកគគ្រេង។
បើ តាមប្រភពព័ត៌មានដែលកម្ពុជាថ្មីចុះទៅដល់មាត់ច្រកអូរបីជាន់ ដែលជាច្រកមួយនាំចូលសត្វគោយ៉ាងច្រើនជាងគេ បានឲ្យដឹងថា ជារៀងរាល់ឆ្នាំ ឲ្យតែដល់ខែដែលខាងភាគីខ្មែរមានស្លឹកព្រិចលាស់ ថៅកែថៃឈ្មោះ ឃុំ រួម ជាមួយប្អូនថ្លៃ ម្តាយក្មេក ដែលរស់នៅបូរីរាំ និងខេត្តសូរិន ប្រទេសថៃ តែងតែនាំគ្នាមកប្រមូលទិញស្លឹកព្រិចពីឈ្មួញខ្មែរ ដែលមាន ៣-៤ នាក់ ដែលដើរប្រមូលទិញស្លឹកព្រិចពីស្រុកនានា យកមកលក់ឲ្យថៃ ដែលមកទិញដល់ដីខ្មែរ ក្នុងមួយគីឡូក្រាមស្លឹកព្រិច ៨០ បាត ស្មើជិតមួយម៉ឺនរៀលដើម្បីយកទៅលក់ចែកចាយតាមផ្សារក្នុងប្រទេស ថៃ។
បើតាមឈ្មួញខ្មែរ ដែលដើរប្រមូលទិញស្លឹកព្រិចពីស្រុកផ្សេងៗចំនួនបួននាក់ ដែលបានយកស្លឹកព្រិចដឹកតាមម៉ូតូដាក់ក្នុងបាវមកលក់ បានរៀបរាប់ឲ្យដឹងថា ពួកគាត់សុទ្ធតែប្រជាពលរដ្ឋនៅភូមិអូរបីជាន់។ ជារៀងរាល់ឆ្នាំនៃរដូវដែលមានស្លឹកព្រិចលាស់ ពួកគាត់ទាំងអស់គ្នា តែងតែជិះម៉ូតូចេញពីភូមិអូរបីជាន់ ពីម៉ោង ៣ ទៅម៉ោង ៤ ទៀបភ្លឺ ទៅស្រុកមោងឬស្សី និងស្រុកគាស់ក្រឡ នៃខេត្តបាត់ដំបង ដើម្បីប្រមូលទិញស្លឹកព្រិចពីប្រជាពលរដ្ឋ ដែលគេបានស្លឹកព្រិចមា្នក់១ គីឡូ ២ គីឡូ ៣ គីឡូ ដោយក្នុងមួយព្រឹកអាចរកទិញបាន ៥០ គីឡូទៅ ១០០ គីឡូ ទើបត្រឡប់មកវិញឲ្យបានម៉ោង ៣ ទៅ ៤ ដើម្បីលក់ឲ្យឈ្មួញថ្លៃក្នុង ១ គីឡូ ៨០ បាត ដោយក្នុងមួយថ្ងៃរកចំណូលបាន ៥ ទៅ ៦ ម៉ឺនរៀលដែរ។
ឈ្មួញ ខ្មែរបាននិយាយទៀតថា ស្លឹកព្រិចខ្មែរមិនសូវហូបទេ ព្រោះខ្លាចពុល តែចំណែកថៃវិញ ចូលចិត្តណាស់ ព្រោះថានៅប្រទេសគេ គឺដាំសម្បូរទៅដោយជាតិគីមី ចំណែកឯរបស់ខ្មែរយើង គឺដុះតាមធម្មជាតិ ទើបថៃចេះតែមកទិញជារៀងរាល់ឆ្នាំ ធ្វើឲ្យពួកគាត់អាចរកចំណូលចូលគ្រួសារបានគ្រាន់ចិញ្ចឹមគ្រួសារ ដែរ។
ចំពោះថៅកែថៃឈ្មោះ ឃុំ ដែលនាំបងប្អូន ឪពុកម្តាយមួយគ្រួសារ មកទិញស្លឹកព្រិចខ្មែរបាននិយាយថា គាត់ទិញព្រិចក្នុងមួយថ្ងៃបានប្រហែល ៥០០ ទៅ ៦០០ គីឡូ ដោយក្នុងមួយគីឡូទទួលទិញថ្លៃ ៨០ បាត ហើយយកទៅលក់វិញ ១ គីឡូ ៩០ បាត។ សម្រាប់ស្លឹកព្រិចនេះ យកទៅស្ងោរនិងឆាគឺមានរសជាតិឆ្ងាញ់ណាស់។
ដោយឡែក បើតាមស្ត្រីខ្មែរម្នាក់ ដែលរស់នៅឃុំអូរបីជាន់ ដែលមកទិញស្លឹកព្រិចពីថៅកែបន្តយកទៅលក់ បានឲ្យដឹងថា គាត់តែងតែមកសុំទិញស្លឹកព្រិចពីថៃក្នុង ១ គីឡូ ៩០ បាត ហើយយកទៅចងបាច់លក់នៅក្នុងដីថៃ មួយបាច់តូចៗប្រហែលមួយខាំកន្លះ បានតម្លៃ២៥ បាត។
និយាយរួម ស្លឹកព្រិចនេះទោះជាឈ្មួញខ្មែរប្រមូលទិញបានប៉ុន្មានក៏ថៃទិញដែរ ហើយតម្លៃបានខ្ពស់ផងដែរ៕
